Hapni një disk BitLocker në Mac

Lidhni një disk BitLocker me një Mac dhe Finder ofron ta fshijë. Ja pse, dhe si ta lexoni diskun në vend të kësaj.

Çfarë është BitLocker

BitLocker është fshehtëzimi i ndërtuar brenda Windows. Kur është i ndezur, gjithçka që shkruhet në disk përzihet, dhe përmbajtja nuk lexohet dot pa fjalëkalim. Windows e përdor në diskun e vet, si edhe në disqe USB e karta memorieje, ku quhet BitLocker To Go.

Në të dyja rastet është i njëjti fshehtëzim. Nëse disku humbet, ai që e gjen nuk lexon dot asgjë prej tij.

Çfarë ndodh kur lidhni një të tillë me një Mac

Finder thotë se disku nuk lexohet dhe ofron ta nisë nga e para ose ta fshijë. Nuk kërkon fjalëkalim, dhe asgjë në ekran nuk ju lë të kuptoni se disku është i kyçur e jo i prishur.

Disku nuk është dëmtuar. macOS ka fshehtëzimin e vet, FileVault, dhe nga BitLocker nuk kupton fare. Lexon fillimin e diskut, gjen një rregullim që nuk e njeh, dhe e trajton diskun si të paformatuar, kështu që e vetmja gjë që mund të ofrojë është ta fshijë.

Si e hap Lukotta

Linux di ta lexojë BitLocker prej vitesh, dhe pikërisht këtë përdor Lukotta. Nis në sfond një sistem të vogël Linux, i dorëzon diskun, dhe e shkyç atje me fjalëkalimin që shkruani. Disku i shkyçur kthehet te Finder, ku shfaqet te Locations, pranë disqeve tuaja të tjera.

Disku as shndërrohet, as kopjohet. Mbetet disk BitLocker, mbetet i fshehtëzuar, dhe Windows e lexon si më parë.

Si ta hapni diskun

1. Lidhni diskun. Lukotta e rendit dhe e tregon si të kyçur.
2. Klikoni mbi të dhe shkruani fjalëkalimin që përdorni në Windows.
3. Disku shfaqet në Finder, te Locations.

Nëse nuk e keni fjalëkalimin

Kur disku u fshehtëzua, Windows nxori një çelës rikuperimi dhe pyeti ku të ruhej. Ai e hap diskun në vend të fjalëkalimit. Ka 48 shifra, në tetë grupe nga gjashtë:

123456-789012-345678-901234-567890-123456-789012-345678

Mund të jetë ruajtur në një llogari Microsoft, në një skedar teksti, ose i shtypur në letër. Ngjiteni aty ku do të shkonte fjalëkalimi.

Pa fjalëkalimin ose çelësin, diskun nuk e hap dot asnjë program, në asnjë kompjuter.

Disqe që nuk hapen në një Mac

Disa kompjutera me Windows nuk kërkojnë kurrë fjalëkalim. E mbajnë çelësin në një çip mbi pllakën amë, të quajtur TPM, dhe e shkyçin diskun vetë kur ajo makinë niset.

Një disk i rregulluar kështu punon vetëm në kompjuterin nga i cili vjen, sepse çelësi nuk del kurrë prej tij. Asnjë Mac nuk e hap dot, e as ndonjë kompjuter tjetër me Windows. Nëse gjatë fshehtëzimit të diskut u ruajt një çelës rikuperimi, ai e hap ende.

Si të kopjoni skedarë në disk

Disqet BitLocker hapen si për lexim ashtu edhe për shkrim, kështu që një Mac mund t'i shtojë skedarë një kopjeje rezervë nga Windows, jo vetëm të marrë prej saj.

Lukotta mund ta hapë diskun edhe vetëm për lexim, gjë që ia vlen kur po shpëtoni skedarë nga një disk që ka nisur të bëjë probleme. Atëherë nuk shkruhet dot asgjë në të.